Starfsmaður í vinnugalla við vörubíl

Gildi og Festa sameinast

Aukaársfundir Gildis og Festu hafa samþykkt sameiningu sjóðanna. Sjóðirnir renna saman 1. janúar 2027 undir nafni Gildis, að fengnu samþykki yfirvalda. Hér á þessari síðu finna sjóðfélagar beggja sjóða upplýsingar um hvað sameiningin felur í sér.

Fulltrúar Gildis og Festu við undirritun samrunasamnings
Frá undirritun samrunasamnings Gildis og Festu 4. september 2026. Sitjandi frá vinstri: Bjarnheiður Hallsdóttir, stjórnarmaður Gildis, Perla Ösp Ásgeirsdóttir, formaður stjórnar Gildis, Silja Eyrún Steingrímsdóttir, formaður stjórnar Festu, og Halldór Kristinsson, varaformaður stjórnar Festu. Standandi frá vinstri: Davíð Rúdólfsson, framkvæmdastjóri Gildis, og Gylfi Jónasson, framkvæmdastjóri Festu.

Í stuttu máli

Aukaársfundir beggja sjóða hafa samþykkt sameiningu Gildis og Festu. Sjóðirnir renna saman 1. janúar 2027 og sameinaður sjóður mun heita Gildi-lífeyrissjóður.

Sameinaður sjóður verður sá næststærsti á landinu og sá fjölmennasti. Miðað við stöðu sjóðanna í árslok 2025 yrði hrein eign hans um 1.570 milljarðar króna.

Sameinaður sjóður verður með skrifstofur í Reykjavík, Reykjanesbæ, á Akranesi og á Selfossi.

Áður en sameiningin tekur gildi þarf heimild frá Samkeppniseftirlitinu. Jafnframt þurfa samþykktabreytingar vegna sameiningarinnar staðfestingu fjármála- og efnahagsráðherra að fenginni umsögn fjármálaeftirlits Seðlabanka Íslands.

Af hverju sameining?

„Sameinaður sjóður hefur það markmið að vera traustur og eftirsóttur kostur til uppbyggingar lífeyrisréttinda og séreignarsparnaðar, með áherslu á öfluga þjónustu, hagkvæman rekstur, ábyrga stýringu eigna og sköpun langtímaverðmæta í þágu sjóðfélaga.“

Úr samrunasamningi Gildis og Festu

Markmið sameiningarinnar er að bæta hag sjóðfélaga. Stjórnir og framkvæmdastjórar beggja sjóða eru sammála um að verulegur ávinningur sé af samrunanum fyrir sjóðfélaga beggja sjóða.

Sjóðirnir eru um margt sambærilegir hvað varðar sjóðfélagahópa, réttindakerfi og tryggingafræðilegar forsendur, sem auðveldar samþættingu starfseminnar.

Ekki er gert ráð fyrir fækkun starfsmanna vegna sameiningarinnar og sameinaður sjóður verður áfram með skrifstofur á fjórum stöðum.

Hagkvæmari rekstur

Aukin stærð sameinaðs sjóðs skilar frekari hagkvæmni í rekstri og hlutfallslega lægri rekstrarkostnaði til lengri tíma.

Stafrænar lausnir og öryggi

Tækni, sjálfvirkni og stafrænar lausnir efla þjónustu, samhliða auknum kröfum um rekstrar- og upplýsingaöryggi.

Góð ávöxtun til lengri tíma

Stærra eignasafn og aukinn slagkraftur í eignastýringu styrkja fjárhagslegar forsendur lífeyrisréttinda og séreignarsparnaðar.

Breiðari fagþekking

Sterk fagleg geta beggja sjóða myndar breiðari þekkingargrunn og eykur tækifæri starfsfólks til sérhæfingar.

Betri þjónusta

Aukið þjónustustig, persónubundin þjónusta, ráðgjöf um lífeyrismál og betra aðgengi að upplýsingum.

Öflugur langtímafjárfestir

Sterkari staða sem öflugur langtímafjárfestir og ábyrgur þátttakandi á íslenskum fjármálamarkaði.

Áætlaður ávinningur á ári

Mat sjóðanna með aðstoð ytri ráðgjafa, byggt á rekstrartölum þeirra fyrir árið 2025.

0,6–1,2 ma.kr.
Áætluð árleg samlegð samanlagt
200–340 m.kr.
Árleg samlegðaráhrif í rekstri
9–15% af rekstrarkostnaði sjóðanna
430–850 m.kr.
Árlegur ávinningur vegna lægri fjárfestingargjalda
7–14% af samanlögðum fjárfestingargjöldum sjóðanna

Stærri sjóður skapar tækifæri til að nýta fjármuni og starfskrafta betur og halda rekstrarkostnaði hlutfallslega lægri til lengri tíma. Ekki er gert ráð fyrir fækkun starfsfólks umfram það sem fyrirséð er vegna aldurstengdra starfsloka.

Ávinningurinn af lægri fjárfestingargjöldum felst einkum í betri samningskjörum og auknum stærðarafsláttum hjá erlendum stýringaraðilum.

Ávinningur sameiningar felst þó ekki eingöngu í lægri kostnaði. Sameinaður sjóður hefur sterkari samningsstöðu og betri forsendur til að nýta fjárfestingartækifæri sem oft standa aðeins stærri fjárfestum til boða.

Sjóðirnir í tölum

Lykiltölur úr starfsemi Gildis og Festu í árslok 2025 og samanlagðar tölur sjóðanna, sem gefa mynd af stærð sameinaðs sjóðs.

Lykiltölur Gildis og Festu 2025
Árslok 2025 Gildi Festa Samanlagt
Hrein eign til greiðslu lífeyris1.225,1 ma.kr.346,5 ma.kr.1.571,6 ma.kr.
þar af samtryggingardeild1.213,6 ma.kr.344,4 ma.kr.1.558,0 ma.kr.
þar af séreignardeild11,5 ma.kr.2,2 ma.kr.13,7 ma.kr.
Sjóðfélagar með réttindi285.370116.382401.752*
Sjóðfélagar sem greiddu iðgjöld 202559.47420.58680.060*
Launagreiðendur 20258.6483.25811.906*
Lífeyrisþegar33.32813.21146.539*
Iðgjöld 202556,3 ma.kr.18,8 ma.kr.75,1 ma.kr.
Lífeyrisgreiðslur 202537,5 ma.kr.9,3 ma.kr.46,8 ma.kr.
Hrein nafnávöxtun samtryggingardeildar 20257,1%5,3%–
Hrein raunávöxtun samtryggingardeildar 20253,3%1,5%–
Meðalraunávöxtun síðustu 10 ára3,8%3,4%–
Rekstrarkostnaður1.700 m.kr.501 m.kr.2.201 m.kr.
Rekstrarkostnaður sem hlutfall af eignum0,14%0,15%–
Eignir samtryggingardeildar í erlendri mynt39,5%38,6%um 39%
Tryggingafræðileg heildarstaða−1,8%−2,6%–
Starfsmenn501666
Stöðugildi47,915,163,0

* Einföld samlagning. Sumir sjóðfélagar eiga réttindi í báðum sjóðum og sumir launagreiðendur greiða til beggja, svo raunverulegur fjöldi í sameinuðum sjóði verður nokkru lægri.

Heimild: ársskýrslur Gildis og Festu fyrir árið 2025. Iðgjöld beggja sjóða eru að meðtöldu framlagi ríkissjóðs til jöfnunar örorkubyrði, 2,9 ma.kr. hjá Gildi og 0,8 ma.kr. hjá Festu.

Eigna- og réttindastaða eftir sameiningu

Miðað við árslok 2025 yrði sameinaður sjóður næststærsti lífeyrissjóður landsins að eignum og sá fjölmennasti. Endanleg eigna- og réttindastaða mun ráðast af ársuppgjöri sjóðanna fyrir árið 2026 og tryggingafræðilegri úttekt.

Hlutdeild í eignumHrein eign í árslok 2025
Gildi 78%
Festa 22%
Hlutdeild í iðgjöldumIðgjöld 2025
Gildi 75%
Festa 25%

Hlutfall iðgjalda er grundvöllur nýrrar réttindatöflu sameinaðs sjóðs, sem endurspeglar réttindatöflu Gildis að ¾ hlutum og réttindatöflu Festu að ¼ hluta.

Réttindastaða

Tryggingafræðileg staða segir til um getu lífeyrissjóðs til að standa við skuldbindingar sínar gagnvart sjóðfélögum. Staða beggja sjóða var lítillega neikvæð í árslok 2025 en vel innan þeirra marka sem lög kveða á um.

Áunnin réttindi kunna að breytast vegna jöfnunar á stöðu sjóðanna en haldast að öðru leyti óbreytt við sameininguna. Jöfnunin byggir á tryggingafræðilegri úttekt og ársuppgjörum sjóðanna fyrir árið 2026. Niðurstaðan verður kynnt í aðdraganda fyrsta ársfundar sameinaðs sjóðs, sem haldinn verður fyrir lok maí 2027.

Gildi
−1,8%
Heildarstaða í árslok 2025
Festa
−2,6%
Heildarstaða í árslok 2025

Tímalína sameiningar

Helstu skref frá upphafi viðræðna til fyrsta ársfundar sameinaðs sjóðs.

  1. {{ t.date }} {{ t.year }}
    {{ t.title }} {{ t.text }}

Hvernig fer sameiningin fram?

Forsenda sameiningarinnar er að sjóðfélagar beggja sjóða eigi jafn verðmæt réttindi eftir sameininguna og fyrir hana. Sameiningin á ekki að bæta hag sjóðfélaga annars sjóðsins á kostnað hins, heldur styrkja lífeyrisréttindi sjóðfélaga beggja sjóða til framtíðar.

  1. 1

    Sjóðirnir sameinast

    Allar eignir, réttindi og skuldbindingar beggja sjóða miðað við stöðu 31. desember 2026 færast í sameinaðan sjóð. Frá 1. janúar 2027 starfar hann undir nafni Gildis á grundvelli nýrra samþykkta.

  2. 2

    Samræmt eignamat

    Sjóðirnir og ytri endurskoðendur þeirra yfirfara matsreglur eigna svo að sömu aðferðum sé beitt í báðum sjóðum við mat eigna og skuldbindinga.

  3. 3

    Ný réttindatafla

    Ný réttindatafla byggir á tryggingafræðilegum forsendum sameinaðs sjóðs. Hún endurspeglar í stórum dráttum réttindatöflu Gildis að ¾ hlutum og réttindatöflu Festu að ¼ hluta, í hlutfalli við iðgjöld sjóðanna.

  4. 4

    Lokauppgjör sjóðanna

    Ársreikningar beggja sjóða fyrir árið 2026 eru gerðir á grundvelli samræmds eignamats og lagðir fram á fyrsta ársfundi sameinaðs sjóðs. Stjórn Festu starfar áfram fram að þeim fundi og leggur þar fram ársreikning Festu.

  5. 5

    Jöfnun milli sjóðanna

    Við gerð ársuppgjöra sjóðanna fyrir árið 2026 verður tryggingafræðileg staða þeirra metin og borin saman. Reynist munur á stöðu þeirra er hann jafnaður í þeim sjóði sem lakar stendur. Niðurstaðan verður kynnt í aðdraganda fyrsta ársfundar sameinaðs sjóðs, sem haldinn verður fyrir lok maí 2027.

Stjórn og fulltrúaráð

Stjórnir beggja sjóða eru skipaðar að jöfnu fulltrúum launamanna og atvinnurekenda. Fulltrúar launamanna eru kosnir á ársfundi og Samtök atvinnulífsins tilnefna fulltrúa atvinnurekenda. Sameinaður sjóður mun starfa á grundvelli samþykkta Gildis, en við sameininguna verða gerðar tímabundnar breytingar svo að sjónarmið beggja sjóða komi að stjórn hans.

Stjórn

Stjórn Gildis
8 stjórnarmenn

Fjórir eru kosnir af fulltrúum sjóðfélaga á ársfundi og fjórir tilnefndir af Samtökum atvinnulífsins. Fjórir varamenn eru í stjórn Gildis.

Stjórn Festu
6 stjórnarmenn

Þrír fulltrúar launamanna eru kosnir á ársfundi og þrír fulltrúar atvinnurekenda eru tilnefndir af Samtökum atvinnulífsins. Tveir varamenn eru í stjórn Festu.

Stjórn sameinaðs sjóðs
8 stjórnarmenn (10 til bráðabirgða)

Frá gildistöku sameiningar og fram að fyrsta ársfundi sameinaðs sjóðs verða tíu aðalmenn í stjórn, átta núverandi aðalmenn í stjórn Gildis ásamt formanni og varaformanni stjórnar Festu. Varamönnum mun á sama tíma fjölga úr fjórum í sex og verða þeir tveir sem bætast við valdir úr hópi núverandi aðalmanna í stjórn Festu.

Eftir fyrsta ársfund sameinaðs sjóðs mun stjórn sjóðsins aftur verða skipuð átta aðalmönnum og fjórum varamönnum.

Fulltrúaráð

Fulltrúaráð Gildis
160 fulltrúar

80 fulltrúar atvinnurekenda og 80 fulltrúar stéttarfélaga.

Fulltrúaráð Festu
120 fulltrúar

60 fulltrúar atvinnurekenda og 60 fulltrúar stéttarfélaga.

Fulltrúaráð sameinaðs sjóðs
200 fulltrúar

100 fulltrúar atvinnurekenda og 100 fulltrúar stéttarfélaga. Af hvorum hópi tilnefna aðildarfélög Gildis 75 og aðildarfélög Festu 25. Skipting fulltrúa milli aðildarfélaga verður endurmetin haustið 2027 út frá vægi iðgjalda.

Hvað þýðir þetta fyrir mig?

Sameining Gildis og Festu snertir sjóðfélaga beggja sjóða. Veldu núverandi sjóðinn þinn til að kynna þér hvað sameiningin þýðir fyrir þig.

Áttu réttindi í báðum sjóðum? Þau flytjast öll í sameinaðan sjóð og réttindi úr hvorum sjóði um sig verða varðveitt sérstaklega.

Kona í hjálmi og vinnugalla við álver

Sjóðfélagar

Réttindi sem þú hefur áunnið þér hjá Gildi haldast óbreytt, ef frá eru talin áhrif af jöfnun á mögulegum mun á stöðu sjóðanna.

Frá 1. janúar 2027 ávinnur þú þér réttindi samkvæmt nýrri réttindatöflu sameinaðs sjóðs. Hún byggir að ¾ hlutum á réttindatöflu Gildis og að ¼ hluta á réttindatöflu Festu, í hlutfalli við iðgjöld sjóðanna, svo ávinnsla nýrra réttinda getur breyst lítillega.

Þú skráir þig áfram inn á Mínar síður á gildi.is og sérð þar öll þín réttindi. Ef þú ert með sjóðfélagalán hjá Gildi hefur sameiningin engin áhrif á skilmála þess eða afborganir.

Lífeyrisþegar

Lífeyrisgreiðslur halda áfram með sama hætti og áður. Bæði Gildi og Festa greiða út lífeyri í gegnum Greiðslustofu lífeyrissjóða og því verður engin breyting á því hvernig lífeyrir er greiddur út við sameininguna.

Ef lækka þarf réttindi í öðrum sjóðnum til að jafna stöðu sjóðanna verður lífeyrir þeirra sem fá greitt úr þeim sjóði ekki lækkaður í krónum talið. Í staðinn hætta greiðslurnar tímabundið að hækka með verðlagi frá 1. september 2027, þar til uppsöfnuð verðbólga nemur lækkuninni. Eftir það hækka þær aftur með verðlagi eins og áður.

Eldri maður með hjálm og sóp á byggingarsvæði
Kona við afgreiðsluborð á veitingastað

Launagreiðendur

Launagreiðendur sem greiða nú þegar til Gildis halda því áfram með sama hætti.

Frá 1. janúar 2027 tekur sameinaður sjóður einnig við iðgjöldum sem áður voru greidd til Festu.

Séreignarsparnaður

Innstæður þínar í séreign verða óbreyttar og framboð séreignarleiða hjá Gildi tekur ekki breytingum vegna sameiningarinnar.

Séreign sjóðfélaga beggja sjóða verður í séreignarleiðum sameinaðs sjóðs. Eignasöfn leiðanna stækka við það, sem getur styrkt eignastýringu þeirra til lengri tíma.

Ungur smiður að störfum á byggingarsvæði
Kona að leik með börnum í leikskóla

Sjóðfélagar

Réttindi sem þú hefur áunnið þér hjá Festu flytjast í sameinaðan sjóð og verða varðveitt sérstaklega. Þau haldast óbreytt, ef frá eru talin áhrif af jöfnun á mögulegum mun á stöðu sjóðanna.

Frá 1. janúar 2027 ávinnur þú þér réttindi samkvæmt nýrri réttindatöflu sameinaðs sjóðs. Hún byggir að ¼ hluta á réttindatöflu Festu og að ¾ hlutum á réttindatöflu Gildis, í hlutfalli við iðgjöld sjóðanna, svo ávinnsla nýrra réttinda getur breyst lítillega.

Eftir sameiningu verða allar upplýsingar um stöðu þína aðgengilegar á Mínum síðum á gildi.is. Ef þú ert með sjóðfélagalán hjá Festu hefur sameiningin engin áhrif á skilmála þess eða afborganir.

Lífeyrisþegar

Lífeyrisgreiðslur halda áfram með sama hætti og áður. Bæði Festa og Gildi greiða út lífeyri í gegnum Greiðslustofu lífeyrissjóða og því verður engin breyting á því hvernig lífeyrir er greiddur út við sameininguna.

Ef lækka þarf réttindi í öðrum sjóðnum til að jafna stöðu sjóðanna verður lífeyrir þeirra sem fá greitt úr þeim sjóði ekki lækkaður í krónum talið. Í staðinn hætta greiðslurnar tímabundið að hækka með verðlagi frá 1. september 2027, þar til uppsöfnuð verðbólga nemur lækkuninni. Eftir það hækka þær aftur með verðlagi eins og áður.

Eldri sjómaður að störfum á þilfari
Þjónn leggur á borð á veitingastað

Launagreiðendur

Fram að gildistöku sameiningarinnar eru iðgjöld greidd til Festu eins og áður.

Frá 1. janúar 2027 tekur sameinaður sjóður við öllum iðgjöldum sem nú eru greidd til Festu.

Séreignarsparnaður

Innstæður þínar í séreign verða óbreyttar við sameininguna.

Sparnaðarleiðir Festu færast í séreignarleiðir sameinaðs sjóðs, eins og sýnt er hér fyrir neðan.

Starfsmaður flokkar raftæki á endurvinnslustöð
Festa í dag
Séreignarleiðir sameinaðs sjóðs
Eign – 70/30
Sparnaðarleið 2
Eign – 50/50
Sparnaðarleið 1
Eign – 20/80
Eign – Verðtryggð
Eign – Erlend
Eign – Aldurstengd

Hvað verður um sparnaðarleiðina mína?

Á næstu mánuðum eftir sameiningu er miðað við að Sparnaðarleið 1 sameinist Eign – 20/80 og Sparnaðarleið 2 sameinist Eign – 50/50 í sameinuðum sjóði.

Áður en þær breytingar koma til framkvæmda verður þér gerð nánari grein fyrir hvað í þeim felst og hvaða fleiri valkostir standa þér til boða.

Fjórar skrifstofur

Sameinaður sjóður verður áfram með skrifstofur á öllum stöðum þar sem sjóðirnir starfa í dag.

Reykjavík
Guðrúnartúni 1
Reykjanesbær
Krossmóa 4a
Akranes
Kirkjubraut 40
Selfoss
Austurvegi 56

Spurt og svarað

Finnur þú ekki svarið? Hafðu samband við Gildi í síma 515 4700 eða Festu í síma 420 2100.

{{ pt.lead }} {{ pt.text }}

Skjöl

Tillögur að breyttum samþykktum

Fréttir og tilkynningar

5. nóvember 2026 Samruni Gildis og Festu samþykktur Aukaársfundur Gildis samþykkti sameiningu sjóðanna tveggja.
4. nóvember 2026 Niðurstaða aukaársfundar Festu 2026 Aukaársfundur Festu samþykkti sameiningu sjóðanna tveggja.
4. september 2026 Samrunasamningur Gildis og Festu undirritaður Stjórnir sjóðanna hafa samþykkt samning um sameiningu. Gangi hún eftir verður til næststærsti og fjölmennasti lífeyrissjóður landsins.
Júní 2026 Gildi og Festa hefja sameiningarviðræður Formlegar viðræður um mögulega sameiningu sjóðanna hófust í byrjun júní.